Gyarwi manzil ko jab pehli baar neeche se dekha toh chaundhiyaati hui doop se aakhon ke saamne maano andhera sa chha gaya tha.
Lift ki ghanghnati aawaz aur raftaar se pal bhar ke liye duniya choti ho gayi thi.
Itni jaldi pahoonch gaya?? Par jab balcony se pahoonch kar dekha ,toh baahr baarish ho rahi thi..Iss choti si lift ki journey mein ek mausam badal gaya tha .
Niche se jo dhoop dikh raha tha upar pahoonch teh hi baarish mein badal gaya ..wah baarish aa chuki thi. Samay ki raftaar us lift se bhi jyaada thi.
In unchaayiyon se jab neeche dekhta hoon toh seher key chote bade ghar maano alag alag log jaise dikhte hoon ,fark sirf unkey kad rang aur umar ka tha.
Raat mein toh balcony se dekhney ka nazara hi kuch alag tha ,indra dev jyada tar iss sehar mein raat ko hi garaj teh hain.
Yeh ghar mere liye kaafi mainey rakhta hai,bhaley hi aadhi kamayi iskey rent mein hi chli jaati ho par dostoon ki wah wahi aur bachpan se unchaayi mein rehne ki tamanna ko koi nahi rok sakta tha.
kaafi dino rehney ke baad ek weekend dooston ko dinner par bulaaya
Sabon ko ghar kaafi pasand aaya ,kisi ko toh maine yeh bhi bolte suna “bhai itni uchaayi waaley ghar mein pehli baar aa raha hoon” , kuch to itna jal rahe the ki aisa lag raha tha ki jalney ki boo cigarette se nahi balki unkey pichware se aa rahi ho.
Par Shaam ki highlight thi meri balcony. Sabhi balcony aur uskey nazaarey key deewane ho chuke the.
“Mumbai mein gyaarwi floor par ghar hai mera” yeh kahey bina ek din nahi jaata tha, kitni baar toh kaam karney waali jab ghar aati thi toh usey bhi bata deta tha.
Ek din ki baat hai , sham key waqt jab office se wapas ghar pahooncha toh dekha ,ki baayi lift ke baahar khadi hai …. jhat se maine kaha “arrey tum yahhan kya kar rahi ho ghar toh mera gyaarahwi floor par hain na. Gussey mein usney bola “toh kya ud key jaaon”,aas paas jitney bhi log the sab zoor se hasney lagey. shaayad unhe bhi meri gyaarwi floor ke bare mein pata chal gaya tha.
Us din ke baad kabhi bhi mainey kaamwaali se ghar ki charcha nahi ki,Itna hi nahi office mein ghar kaa naam bhi koi nahi lena chahata tha unhey darr lagta tha , kahin mein apne ghar ki kahaani phir se naa shru kar doon.
Office mein mujhe log nau du gyarah bulaate the, gyaarah toh main samjhta hoon par nau aur do ka male main samajh nahi paaya
Khair duniyaa chahey kuch bhi kahe , shaam ke waqt jo balcony par chai peeney aur us unchayi se thookne ka maza hai uska andaaza koi nahi laga sakata .
Main apney ghar ki unchaayi ko thook phek kar maapta tha,thook phekney key tees second baad neeche pahoonchti thi.” Wah itna lamba faasla tees second kaafi hootein hai”.
Us din main office se apney usual time se ghar pahley aa chuka tha , ek pyaali chai pi li thi,khaana khaaney mein abhi ek ghantey baaki the. Aaj toh Balcony mein bhi kuch maza nahi tha.
Main andar iss bahaney jaata hoon shayad pyaas lagi hai ,raastey mein agar saaf suthra bath room dikh jay to thoda samay wahaan par bhi bitaa loonga.
Tabhi Balcony se kuch awaaz aati hai main daudte huye wahhaan jaata hoon.
Kuch bhi nahi tha ,neech dekha ,deewaroon par chad kar neeche dekha .koshsih puri ki apni jaan laga di phir bhi koi andaaz nahi mila ki aakhir yeh aawaz kya thi , Balcony ke kooney par ek patthar dikhta hai.
Meri pehli nazar saamne ke us bhoori building par jaati hai (ji haan wahi do manzila makaan hai )jroz shaam ek ladka hamaarey ghar par aankh lagaaye rehta hai. “Jalata hai saala”, mainey khud se kaha , “meri iss unchayi se wah do manzila ka insaan jalta hai”.
Main matiyan kar bas ander aanewalla tha ki ek bacche ki hasney ki awwaz aayi.
Bhauchakkit ho kar neech ki manzil ko dekhta hoon koi nahi ,
Ek nanhi si awwaz sunayi deti hai “bhaiya upar” upar nazar daali toh barahwi manzil ke balcony mein ek chota sa baccha patthar lekar meri taraf neeshana banaye khada tha .Upar dekhte hi sar chakra gaya ,ek zor ka zatka laga .
kya mere ghar ke upar bhi koi rahta hai?Duniyaa chann bhar mein choti si dikhney lagi ,wah baccha ek raakshas swroop visaalkaay dikh raha tha aur main ek bauney ki prjaati ka sabse chota prani .Us bacche ke maathey key piche surya dev waapas se chaundiya rahe the , bina kisi karaan vash aag babula ho rahe the.
Haay …main bhool chuka tha main ek bees manzil ke makaan mein rehta hoon .
Us bachhe ki na chalayi hui pathhar ki chot seenay mein lagi ,khud ko kostey huye mainey kaha “AAkhir mainey flat issey uunchey manzil par kyoon nahi liya,
Ek pal mein us bacche ne mujhe gyarahwi manzil se sidhe ground floor par phek diya tha
“Teeri toh”….gaaliyyan de deta par kya pata iss choti si umar mein meri gaaliyaan wah samajh paata ya us par bhi haans deta.
Agar us bacche ko do teen galiyaan de doon aur uskey maan baap mere gaali dene ka kaaran poochengey toh sara ilzaam us patthar par thok doonga aakhir galati toh usney ki hi thi na.
Aaj kal ke bachhe kaafi mann badhu hoten hain ,main jaanta tha Usney mere par patthar isliye feki kyonki main uskey niche waaley manziley par rehta hoon, aap hi batao kya niche rehney waale insaan nahi hootey, aisey bacche ko toh sabak sikhana chahiye.
Saamney dekha to bhoori building ka ladka chatt par se zor zor se thahaakey maar raha tha
Uski hansi mere kaano mein loud speaker jaise baj rahi thi saath mein wah bachha bhi zor zor se thhaakey maar raha tha.
Par main yeh nahi samajh paa raha tha ke who dono haans kyun rahe the,kya unhe asaliyat ka pata chal gaya tha ya koi aur baat thi jisey main nahi samajh paa raha tha.
Halkey se ek joothi si muskaan dono ki taraf di aur mur kar ghar ke andar aa gaya.
Balcony se ander ghoostey hi ghar mera nahi kisi aur ka lag raha tha.
Baahar zoroon ki baarish ho rahi thi .Indra dev bhi mujh par haans rahe the.
Tv on kiya toh news mein duniya ki sabse unchi imaarat ka udghaatan ho raha tha.
Main hansaa is baar dil se hansaa, kis par, maalom nahi.
Subah utha toh baarish rook chuki thi. Tv abhi bhi chaalo tha ,Office ke liye kaafi late ho chuka tha.
Lift 12 manzil par ataki thi “zaroor us bacchey ki shaitaani hai ,sham ko uskey mummy se uski shikaayat karoonga” . Mann mein do chaar gaaliyaan bhi de di.
Ek nazar sidiyon par gayi,mann maan kah nahi raha tha. “gyaarwi mazil itni bhi unchaayi par nahi hai”
Thakey haare jab neeche pahooncha toh dekha kaafi bhir jama thi, ek aadmi dusre aadmi ko upar ke ishaare ungli dikha rah tha . Main fauran ja kar unsey pocha”kya baat hai bhai saahab”
“Arrey who 12 manzil ka bachha balcony se niche gir gaya”.
Kya..?
Ji haan aaj kal ke maa baap bhi na,dhyaan kahan hai apney bacchey ka!
Uss aadmi ki koi baat bhi mere kaano talak nahi jaa rahi thi , ek sunn si awaaz thi.
Mainey do teen kadam pichey liya aur ek rooti hui aurat se takra gaya, maaf karna mein…….. “mera bachha mera bachha mujhe waapas kar do”.US aurat ne kaha.
Main darr gaya aur ultey pair chalney laga.
Mujhe kuch samajh nahi aa raha tha main bichoon beech road par bhaagney laga .
“11 manzil se niche thook phekne mein tees second lagatey hain toh 12 manzil se bacche ko kitna second laga hoga”
Ek taxi pakdi aur bas chalney laga.
Taxi waaley ne kuch poocha pata nahi kya poocha…main pasiney se bheeg chuka tha,baithte hi sab kuch phir se waapas aa gaya…..Uss bachhey aur us aurat ka chehera .
Bas mujhe samajh mein yeh nahi aa raha tha “aakhir usney apna bachha mujhse kyon maanga”.